Sævar Atli Magnússon

Sævar Atla þekkja öll Leiknisljón. Gulldrengurinn sem búinn er að sprikla í Meistaraflokki síðan 2015 þó að þetta sé fyrsta tímabilið sem hann er ekki gjaldgengur í 2. flokki lengur. Eftir brottför Eyjó og Stjána er Sævar Atli ekki bara leikjahæsti leikmaður meistaraflokks heldur ber hann nú fyrirliðaband félagsins. 

Sævar Atli er búinn að spila upp alla flokka hjá Leikni og snemma var ljóst að um sérstakan hæfileikadreng var að ræða. Hann kom inná undir lok leiks í síðasta leik Pepsiævintýrisins sumarið 2015, þá aðeins 15 ára gamall. Síðan þá hefur verið ljóst að hann tæki við Hilmari Árna sem bjargvættur og hæfileikabomba Breiðholtsins.

Sævar kom sterkur og ákveðinn til leiks síðasta sumar og sýndi stóraukinn líkamlegan styrk sinn þegar hann skoraði nokkur mörk og sýndi flotta takta. En síðan hann hefur fengið fyrirliðabandið í vetur hefur hann farið hamförum og skorað fullt af mörkum í Reykjavíkurmótinu og sýnt leiðtogahæfileika sína í fremstu víglínu frá fyrstu mínútu.

Það er ekki orðum ofaukið að segja að okkur hlakkar gífurlega til sumarsins og framtíðarinnar yfir höfuð með okkar mann sem andlit klúbbsins.

  • Instagram
  • Twitter